-

LU FIGGHIU DI L'EMIGRATU

Chianci lu picciriddu 'ntra la naca,
la vucca a cucchiaredda e fa ngua ngua,
pensa la nanna mentri chi l'annaca:
-chiama la mamma o chiama lu papa`?-
Ma la mamma nun c'e`, nun c'e` papuzzu,
ca sunnu a l'estru in cerca di furtuna,
-e tu pero` nun chianciri curuzzu,
ca la nannuzza tua nun t'abbannuna.
'Ntimo`, 'ntimo` ti dugnu la pappuzza,
stenni li vrazza, pari ca mi ridi,
tale`, tale` com'apri la vuccuzza,
fa comu l'acidduzza 'ntra li nidi.
Ora, curuzzu miu, fa la bo bo,
chiudi l'ucchiuzzi, bravu d'accussi`,
eccu ca lu sunnuzzu ti calo`,
dormi ca poi ti portu a la diddi`.